სარკინიგზო ოპერატორმა 2024 წლის ივლისი-დეკემბრის პერიოდში საზოგადოებრივი მომსახურების ხელშეკრულების ფარგლებში შესრულებული სულ 6,240 რეისიდან 2,600 (41%) - მაგისტრალურ მიმართულებაზე 3,640 (59%) - საგარეუბნო მიმართულებაზე, ყველაზე მეტი -  1,162 რეისი შესრულდა ივლისის თვეში. მას შემდეგ შესრულებული რეისების რაოდენობა ყოველთვიურად იკლებს და დეკემბერში 941-ს შეადგენს. 

საშუალოდ 75%-იანი დატვირთვის და ივლისი-აგვისტოს პერიოდში მაგისტრალურ მიმართულებებზე 100%-ზე მეტი დატვირთვის პირობებში, სარკინიგზო ოპერატორის მიერ გადაყვანილი მგზავრების რაოდენობამ 1,060,951 შეადგინა. გადაყვანილი მგზავრების 66% მაგისტრალურ მიმართულებებით სარგებლობდა, მხოლოდ 33%-მა ისარგებლა საგარეუბნო მიმოსვლის მატარებლებით. ყველაზე მეტი მგზავრი (240,197) გადაყვანილია ივლისის თვეში. მას შემდეგ გადაყვანილი მგზავრების რაოდენობა კლებადია. ყველაზე მეტი მგზავრი ფიქსირდება თბილისი-ბათუმის მაგისტრალურ მიმართულებაზე და 437,498 შეადგენს. 

2024 წლის ივლისი-დეკემბრის პერიოდში სარეალიზაციოდ სულ მიწოდებულ იქნა 1,406,545 ადგილი. 53% მაგისტრალური მიმართულებებისთვის, 47% კი საგარეუბნო მიმართულებებისთვის. ზაფხულის სეზონის გათვალისწინებით, ყველაზე მეტი ადგილი დაფორმირდა ივლისის თვეში. მას შემდეგ ტენდენცია აქაც, ისევე, როგორც ყველა სხვა მაჩვენებელში, კლებადია.  

რაც შეეხება დატვირთულობას, ამ პერიოდის განმავლობაში ყველა მიმართულებისთვის დატვირთულობის მაჩვენებელმა (გადაყვანილი მგზავრების რაოდენობის შეფარდება ფორმირებული ადგილების რაოდენობასთან) საშუალოდ 75%-ს მიაღწია. დატვირთულობის საერთო მაჩვენებელი ყველაზე მაღალი იყო აგვისტოს თვეში და 90%-ს აღწევდა. აღსანიშნავია, რომ მაგისტრალური მიმართულებებისთვის დატვირთულობის საერთო მაჩვენებელი საანგარიშო პერიოდისთვის 94%-ია, მაშინ, როდესაც საგარეუბნო მიმართულებებისთვის ეს მაჩვენებელი მხოლოდ 54%-ს შეადგენს. 

ამ პერიოდის განმავლობაში ზოგიერთ მაგისტრალურ მიმართულებაზე, მაგალითად როგორიცაა თბილისი-ოზურგეთი, თბილისი-ბათუმი, დატვირთულობის მაჩვენებელი 100%-ს აჭარბებდა. 

მოძრავი შემადგენლობის ეფექტიანობა გულისხმობს მუშა მდგომარეობაში მყოფი მოძრავი შემადგენლობებიდან თვის განმავლობაში ფაქტობრივად გამოყენებული მოძრავი შემადგენლობის წილს. მთელი საანგარიშო პერიოდის განმავლობაში მოძრავი შემადგენლობის ეფექტიანობის მაჩვენებლები თანაბარი იყო. შეიცვალა მხოლო GRS ტიპის ელექტრომატარებლის რაოდენობა, რომელთაგან მთლიანი პარკიდან სექტემბრის თვეში მომხდარი ინცინდენტის შედეგად, მუშა პარკიდან ამოირიცხა 1 ელექტრომატარებელი. შედეგად, სექტემბრის თვიდან მოყოლებული GRS სერიის 4 ელექტრომატარებლიდან მხოლოდ 3 იყო მუშა მდგომარეობაში, რომელთაგან სამივე მუშაობდა ფაქტობრივად. GRT/VMK სერიის 4 მუშა ელექტრომატარებლიდან მხოლოდ 2 მუშაობდა ფაქტობრივად. ER & ES სერიის ელექტრომატარებლებისთვის ამ მაჩვენებელმა 64% შეადგინა, სამგზავრო ვაგონების მუშა პარკიდან კი მხოლოდ 29%-მა იმუშავა ფაქტობრივად.

დამტკიცებულია სარკინიგზო სამგზავრო სატრანსპორტო საშუალებებით მგზავრთა გადაყვანის მომსახურების შეღავათიანი ფასით სარგებლობის მქონე პირთა კატეგორიები და საშეღავათო ტარიფები. შეღავათიანი ტარიფით სარგებლობის უფლებით სარგებლობენ:  

• ავტორიზებული უმაღლესი საგანმანათლებლო დაწესებულების სტუდენტი

• ომისა და სამხედრო ძალების ვეტერანები და მათი ოჯახის წევრები

5-დან 10 წლამდე ბავშვებისთვის მოქმედებს საბავშვო ტარიფი (50%). 

აღნიშნულ პირთა კატეგორიებისთვის ბილეთის მოქმედ ტარიფს აკლდება 50%.  შეღავათები მოქმედებს მაგისტრალური მიმოსვლის მატარებლებზე. 

2024 წლის ივლისი-დეკემბრის პერიოდში, სულ გაყიდულია 36,574 საბავშვო ბილეთი (დანიშნული დამატებითი რეისების ჩათვლით). საბავშვო ბილეთებზე სულ გაწეულ იქნა 622,241 ლარის შეღავათი.  

სარკინიგზო ოპერატორს ივლისი-დეკემბრის პერიოდში გაწეული აქვს 1,168,799 ლარის ოდენობის შეღავათი (დღგ-ს ჩათვლით). სულ ამ პერიოდში შეღავათით ისარგებლა 77,781 მგზავრმა. 

ყველაზე ხშირად საშეღავათო ტარიფით სტუდენტის სტატუსის მქონე მგზავრები სარგებლობენ. აღნიშნულ პერიოდში გაწეული შეღავათის 87% სწორედ სტუდენტებზე მოდის.