სამედიცინო დაწესებულებამ სააგენტოში უნდა წარადგინოს სამედიცინო დაწესებულებისა და უფლებამოსილი ექიმის აღიარებაში მონაწილეობის მსურველთა განცხადების ფორმები. სამედიცინო დაწესებულების მიერ შევსებულ განცხადებას თან უნდა ერთვოდეს შემდეგი დოკუმენტები:

• სტაციონარული ტიპის დაწესებულების შემთხვევაში – სამედიცინო საქმიანობის ლიცენზია;

• სამედიცინო დაწესებულებაში განხორციელებული სამედიცინო მომსახურების სრული ჩამონათვალი

• სერტიფიცირებულ ექიმთა სია (რაოდენობა და კვალიფიკაცია);

სამედიცინო დაწესებულებაში დასაქმებული უფლებამოსილი ექიმების განცხადებას თან უნდა ერთვოდეს შემდეგი დოკუმენტაცია:

• პირადობის დამადასტურებელი დოკუმენტის ასლი;

• უმაღლესი სამედიცინო განათლების დამადასტურებელი დიპლომის ასლი;

• საექიმო საქმიანობის უფლების დამადასტურებელი სახელმწიფო სერტიფიკატის ასლი;

• სამედიცინო დაწესებულების ბეჭდისა და ჯანმრთელობის ცნობის ნიმუშები;

სამედიცინო დაწესებულების განცხადება და თანდართული მასალები სამედიცინო დაწესებულებისა და მისი უფლებამოსილი ექიმის აღიარების შესახებ განიხილება საქართველოს ზოგადი ადმინისტრაციული კოდექსით გათვალისწინებული მარტივი ადმინისტრაციული წარმოების წესით. საჭიროების შემთხვევაში, შესაძლებელია, მოთხოვნილ იქნეს დამატებითი დოკუმენტაცია.

სამედიცინო დაწესებულებისა და მისი უფლებამოსილი ექიმის აღიარება ხდება 5 წლის ვადით.

აღიარებული სამედიცინო დაწესებულება ვალდებულია:

• სააგენტოს მოთხოვნისამებრ, მიაწოდოს ინფორმაცია ჯანმრთელობის ცნობის ნამდვილობის შესახებ;
• სააგენტოს წერილობით შეატყობინოს აღიარებული სამედიცინო დაწესებულების საქმიანობასთან დაკავშირებული ინფორმაციაში ცვლილებების შეტანის შესახებ;
• სააგენტოს, სულ მცირე, 1 თვით ადრე შეატყობინოს გადაწყვეტილება ჯანმრთელობის ცნობის გაცემის პროცესის შეწყვეტის შესახებ;
• აცნობოს სააგენტოს ინფორმაცია იმ მემანქანის შესახებ, რომელსაც ჯანმრთელობის მდგომარეობის შეფასებისას გამოუვლინდა შრომისუუნარობა დასაკავებელი თანამდებობით გათვალისწინებული საქმიანობის განხორციელებისთვის;
• სააგენტოს წერილობით შეატყობინოს მისი უფლებამოსილი ექიმის საქმიანობასთან დაკავშირებული ინფორმაციის ცვლილებების შესახებ:
• შეინახოს ჯანმრთელობის ცნობის ასლი და მასთან დაკავშირებული შესაბამისი ინფორმაცია.

აღიარებულ სამედიცინო დაწესებულებაში დასაქმებული უფლებამოსილი ექიმი ვალდებულია:

• იცნობდეს მემანქანეთა ჯანმრთელობის მდგომარეობის შეფასებასთან დაკავშირებულ საქართველოს კანონმდებლობას;
• ჯანმრთელობის ცნობის გაცემისას გაითვალისწინოს მემანქანეთა საქმიანობის სფეროს სპეციფიკა.

აღიარებული სამედიცინო დაწესებულება და მასთან დასაქმებული უფლებამოსილი ექიმი პასუხისმგებელნი არიან მემანქანის ჯანმრთელობის მდგომარეობის შეფასებისა და გაცემული ჯანმრთელობის ცნობის სისწორეზე.

სააგენტო, არანაკლებ წელიწადში ერთხელ, მემანქანეთა სამედიცინო შემოწმების საქართველოს კანონმდებლობით დადგენილ მოთხოვნებთან შესაბამისობის უზრუნველყოფის მიზნით, ახორციელებს აღიარებული სამედიცინო დაწესებულებისა და მისი უფლებამოსილი ექიმის პერიოდულ მონიტორინგს.

აღიარებული სამედიცინო დაწესებულების და მისი უფლებამოსილი ექიმის პერიოდული მონიტორინგი სააგენტოს მიერ შესაძლებელია განხორციელდეს მოწვეულ ექსპერტთან (ექსპერტთა ჯგუფი) თანამშრომლობით.

სააგენტოს მიერ აღიარებული სამედიცინო დაწესებულების და მისი უფლებამოსილი ექიმის პერიოდული მონიტორინგი ხორციელდება შესაბამისი ინფორმაციისა და დოკუმენტაციის შემოწმებისა და შეფასების გზით. 

აღიარებული სამედიცინო დაწესებულებისა და მისი უფლებამოსილი ექიმის მონიტორინგის საფუძველზე, თუ გამოვლინდება აღიარებული სამედიცინო დაწესებულების ან მისი უფლებამოსილი ექიმის მიერ აღიარების პირობების ან/და ჯანმრთელობის დაცვის სფეროში მოქმედი საქართველოს კანონმდებლობის მოთხოვნათა დარღვევა, დარღვევის სისტემურობისა და ხარისხის გათვალისწინებით, სააგენტო უფლებამოსილია, მიიღოს გადაწყვეტილება აღიარებული სამედიცინო დაწესებულების ან/და მისი უფლებამოსილი ექიმის აღიარების შეჩერების, გაუქმების ან/და მისთვის ადმინისტრაციული სახდელის დადების შესახებ.

სააგენტო წერილობით ატყობინებს აღიარებულ სამედიცინო დაწესებულებასა და მის უფლებამოსილ ექიმს აღიარების შეჩერების, გაუქმების ან ადმინისტრაციული სახდელის დადების შესახებ გადაწყვეტილებას.

აღიარების შეჩერების შემთხვევაში, აღიარებულ სამედიცინო დაწესებულებას ან/და მის უფლებამოსილ ექიმს განესაზღვრება არაუმეტეს სამთვიანი ვადა, რომლის განმავლობაში იგი ვალდებულია აღმოფხვრას სააგენტოს მიერ მითითებული ხარვეზები. ხარვეზის აღმოუფხვრელობის შემთხვევაში სააგენტო აუქმებს შესაბამის აღიარებას.

აღიარებული სამედიცინო დაწესებულების ან/და მისი უფლებამოსილი ექიმის მიერ საქართველოს კანონმდებლობით გათვალისწინებული აღიარების პირობების ან/და ჯანმრთელობის დაცვის სფეროში მოქმედი საქართველოს კანონმდებლობის მოთხოვნათა დარღვევისთვის ადმინისტრაციული პასუხისმგებლობის დაკისრებისა და აღიარების გაუქმების შემთხვევაში, ასეთ სამედიცინო დაწესებულებას და მის უფლებამოსილ ექიმს აღიარების გაუქმებიდან 1 წლის განმავლობაში, უფლება არ აქვთ ხელახლა მიმართონ სააგენტოს აღიარების მოთხოვნით. 

სამედიცინო დაწესებულება ვალდებულია, აკმაყოფილებდეს აღიარების შემდეგ პირობებს:

• ფუნქციონირებდეს საქართველოს კანონმდებლობის შესაბამისად და ჰყავდეს სერტიფიცირებული კადრი შემდეგ საექიმო სპეციალობებში: კარდიოლოგია; ნევროლოგია; ოტორინოლარინგოლოგია; ზოგადი ქირურგია; რადიოლოგია (ულტრაბგერითი დიაგნოსტიკა და რენტგენოლოგია); ოფთალმოლოგია; დერმატო-ვენეროლოგია; ინფექციური სნეულებები; ლაბორატორიული მედიცინა; ენდოკრინოლოგია; ნარკოლოგია; ფსიქიატრია.
• მემანქანეების ჯანმრთელობის შეფასებისა და ჯანმრთელობის მდგომარეობის შემოწმების სამედიცინო მოთხოვნების შესაბამისად, მემანქანეთა სამედიცინო შემოწმების ჩატარებისათვის გააჩნდეს აუცილებელი მატერიალურ-ტექნიკური აღჭურვილობა და ჰყავდეს შესაბამისი კვალიფიკაციის მქონე ექიმი.
• უზრუნველყოს მემანქანეთა სამედიცინო ისტორიების კონფიდენციალობა.
• გააჩნდეს სამედიცინო საქმიანობის ლიცენზია.

უფლებამოსილი ექიმი, ვალდებულია, აკმაყოფილებდეს აღიარების შემდეგ პირობებს:

• გააჩნდეს უმაღლესი სამედიცინო განათლება;
• გააჩნდეს დამოუკიდებელი საექიმო საქმიანობის უწყვეტი სამუშაო გამოცდილება ბოლო ხუთი წლის განმავლობაში;
• იყოს დამოუკიდებელი მემანქანეთა დამსაქმებელი ორგანიზაციისგან და თავისი საქმიანობა განახორციელოს მიუკერძოებლად;
• არ ჰქონდეს ინტერესთან შეუთავსებლობა მემანქანესთან;
• გააჩნდეს შესაბამის სპეციალობაში სახელმწიფო სერტიფიკატი;
• იცნობდეს „მემანქანის მართვის მოწმობისა და მემანქანის სერტიფიკატის გაცემის, განახლებისა და აღდგენის, მათი მოქმედების შეჩერებისა და გაუქმების წესებისა და პირობების დამტკიცების შესახებ“ საქართველოს მთავრობის 2024 წლის 25 დეკემბრის №442 დადგენილების №1 დანართით განსაზღვრულ მემანქანეების ჯანმრთელობის შეფასებისა და ჯანმრთელობის მდგომარეობის შემოწმების სამედიცინო მოთხოვნებს.